InternationalNationalPunjab
ਦਾਊਦ ਇਬਰਾਹਿਮ ਗਿਰੋਹ ਦਾ ਪੁਰਾਣਾ ਸਾਥੀ ਲੁਧਿਆਣਾ ਤੋਂ ਕਾਬੂ
ਬਦਨਾਮ ਅੱਤਵਾਦੀ ਦਾਊਦ ਇਬਰਾਹਿਮ ਦੇ ਗਿਰੋਹ ਦੇ ਇੱਕ ਪੁਰਾਣੇ ਸਾਥੀ ਰਾਜਿੰਦਰ ਸਿੰਘ ਉਰਫ਼ ਸੋਨੂੰ ਨੂੰ ਮੋਗਾ ਦੇ ਸੀਆਈਏ ਸਟਾਫ਼ ਨੇ ਲੁਧਿਆਣਾ ਤੋਂ ਗ੍ਰਿਫ਼ਤਾਰ ਕੀਤਾ ਹੈ। ਉਸ ਵਿਰੁੱਧ ਜਲੰਧਰ ਦੇ ਵੱਖੋ–ਵੱਖਰੇ ਥਾਣਿਆਂ ’ਚ 14 ਮਾਮਲੇ ਦਰਜ ਹਨ। ਚਾਰ ਮਾਮਲਿਆਂ ’ਚ ਉਸ ਨੂੰ ਭਗੌੜਾ ਕਰਾਰ ਦਿੱਤਾ ਜਾ ਚੁੱਕਾ ਹੈ।
ਪੁਲਿਸ ਦਾ ਦਾਅਵਾ ਹੈ ਕਿ ਜਦੋਂ ਸੋਨੂੰ ਆਪਣੇ ਚਾਰ ਹੋਰ ਸਾਥੀਆਂ ਨਾਲ ਮਿਲ ਕੇ ਡਕੈਤੀ ਦੀ ਯੋਜਨਾ ਉਲੀਕ ਰਿਹਾ ਸੀ, ਤਦ ਉਸ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਉਹ ਅੱਜ–ਕੱਲ੍ਹ ਆਪਣੀ ਕਿਸੇ ਹੋਰ ਸ਼ਨਾਖ਼ਤ ਨਾਲ ਲੁਧਿਆਣਾ ਜ਼ਿਲ੍ਹੇ ਦੇ ਪਿੰਡ ਜੱਸੀਆਂ ’ਚ ਰਹਿ ਰਿਹਾ ਸੀ।
ਪੁਲਿਸ ਨੇ ਪੰਜ ਮੁਲਜ਼ਮਾਂ ਕੋਲ .32 ਬੋਰ ਪਿਸਤੌਲ, ਦੋ ਅਣਚੱਲੇ ਕਾਰਤੂਸ, 80 ਹਜ਼ਾਰ ਰੁਪਏ ਨਕਦ, ਆਈ–20 ਕਾਰ, ਦੋ ਕ੍ਰਿਪਾਨਾਂ ਤੇ ਹੋਰ ਤੇਜ਼ਧਾਰ ਹਥਿਆਰ ਬਰਾਮਦ ਕੀਤੇ ਹਨ।
ਪੁਲਿਸ ਮੁਤਾਬਕ ਸੋਨੂੰ ਨੇ ਆਪਣਾ ਖ਼ੁਦ ਦਾ ਇੱਕ ਗਿਰੋਹ ਬਣਾ ਲਿਆ ਸੀ। ਉਹ ਸਾਲ 2013–14 ਦੌਰਾਨ ਦਾਊਦ ਇਬਰਾਹਿਮ ਦੀ ਏਜੰਸੀ ਡੀ ਕੰਪਨੀ ਲਈ ਕੰਮ ਕਰਦਾ ਰਿਹਾ ਹੈ। ਜਦੋਂ ਦਾਊਦ ਦੇ ਗਿਰੋਹ ਉੱਤੇ ਪੁਲਿਸ ਦੀ ਸਖ਼ਤੀ ਵਧਦੀ ਚਲੀ ਗਈ, ਤਾਂ ਉਹ ਉੱਥੋਂ ਸਿੱਧਾ ਲੁਧਿਆਣਾ ਆ ਗਿਆ ਸੀ। ਇੱਥੇ ਉਸ ਨੇ ਆਪਣੇ ਆਧਾਰ ਤੇ ਵੋਟਰ ਕਾਰਡ ਵੀ ਬਣਵਾ ਲਏ ਸਨ।