ਸਾਗਰ ਦੇ ਹਾਕੀ ਖਿਡਾਰੀ ਟੈਕਚੰਦ ਬਦਹਾਲੀ ਵਿਚ ਝੁੱਗੀਆਂ ‘ਚ ਦਿਨ ਕੱਟਣ ਲਈ ਹੈ ਮਜਬੂਰ

ਓਡੀਸ਼ਾ ‘ਚ ਹਾਕੀ ਵਿਸ਼ਵ ਕੱਪ ਚੱਲ ਰਿਹਾ ਹੈ। ਅਜਿਹੇ ‘ਚ ਪੂਰੀ ਦੁਨੀਆ ਦੀਆਂ ਨਜ਼ਰਾਂ ਹਾਕੀ ਖਿਡਾਰੀਆਂ ‘ਤੇ ਟਿਕੀਆਂ ਹੋਈਆਂ ਹਨ। ਖਾਸ ਤੌਰ ‘ਤੇ ਹਰ ਕੋਈ ਭਾਰਤੀ ਹਾਕੀ ਖਿਡਾਰੀਆਂ ਬਾਰੇ ਜਾਣਨਾ ਚਾਹੁੰਦਾ ਹੈ। ਪਰ ਕੀ ਤੁਸੀਂ ਇੱਕ ਅਜਿਹੇ ਹਾਕੀ ਖਿਡਾਰੀ ਬਾਰੇ ਜਾਣਦੇ ਹੋ ਜਿਸ ਨੇ 1961 ਵਿੱਚ ਹਾਲੈਂਡ ਨੂੰ ਹਰਾਇਆ ਸੀ। ਜੀ ਹਾਂ, ਅਸੀਂ ਗੱਲ ਕਰ ਰਹੇ ਹਾਂ ਹਾਕੀ ਖਿਡਾਰੀ ਟੇਕਚੰਦ ਯਾਦਵ ਦੀ ਜੋ ਕਦੇ ਭਾਰਤੀ ਹਾਕੀ ਟੀਮ ਦਾ ਅਹਿਮ ਹਿੱਸਾ ਸੀ।

ਟੇਕਚੰਦ ਯਾਦਵ ਦਾ ਜਨਮ 9 ਦਸੰਬਰ 1940 ਨੂੰ ਮੱਧ ਪ੍ਰਦੇਸ਼ ਦੇ ਸਾਗਰ ਜ਼ਿਲ੍ਹੇ ਵਿੱਚ ਹੋਇਆ ਸੀ। ਜਦੋਂ ਉਹ ਸਕੂਲ ਵਿਚ ਪੜ੍ਹਦਾ ਸੀ ਅਤੇ ਬੱਚਿਆਂ ਨੂੰ ਹਾਕੀ ਖੇਡਦੇ ਦੇਖਦਾ ਸੀ ਤਾਂ ਉਸ ਵਿਚ ਵੀ ਹਾਕੀ ਖੇਡਣ ਦਾ ਉਤਸ਼ਾਹ ਪੈਦਾ ਹੋ ਗਿਆ ਅਤੇ ਉਸ ਨੇ ਦਰੱਖਤ ਦੀ ਲੱਕੜ ਕੱਟ ਕੇ ਹਾਕੀ ਬਣਾ ਲਈ ਅਤੇ ਦੋਸਤਾਂ ਨਾਲ ਹਾਕੀ ਖੇਡਣ ਲੱਗ ਪਿਆ।

1960 ਵਿੱਚ ਮੇਜਰ ਧਿਆਨਚੰਦ ਐਮਆਰਸੀ ਸਾਗਰ ਆਏ। ਇਸ ਦੌਰਾਨ ਉਨ੍ਹਾਂ ਨੇ ਸਾਗਰ ਅਤੇ ਜਬਲਪੁਰ ਦੇ ਹਾਕੀ ਖਿਡਾਰੀਆਂ ਨੂੰ ਬੁਲਾਇਆ। ਟੇਕਚੰਦ ਵੀ ਉਨ੍ਹਾਂ ਖਿਡਾਰੀਆਂ ਵਿੱਚੋਂ ਇੱਕ ਸੀ। ਇਸ ਦੌਰਾਨ ਮੇਜਰ ਧਿਆਨਚੰਦ 3 ਮਹੀਨੇ ਉੱਥੇ ਰਹੇ ਅਤੇ ਉਨ੍ਹਾਂ ਖਿਡਾਰੀਆਂ ਨੂੰ ਹਾਕੀ ਦੇ ਗੁਰ ਸਿਖਾਏ।
ਮੇਜਰ ਧਿਆਨਚੰਦ ਤੋਂ ਸਿਖਲਾਈ ਲੈਣ ਤੋਂ ਬਾਅਦ ਹੀ ਟੇਕਚੰਦ ਯਾਦਵ ਨੂੰ ਭਾਰਤੀ ਟੀਮ ਲਈ ਖੇਡਣ ਦਾ ਮੌਕਾ ਮਿਲਿਆ ਅਤੇ 1961 ਵਿੱਚ ਹਾਲੈਂਡ ਅਤੇ ਨਿਊਜ਼ੀਲੈਂਡ ਨਾਲ ਮੈਚ ਖੇਡੇ। ਉਸ ਦੇ ਸ਼ਾਨਦਾਰ ਪ੍ਰਦਰਸ਼ਨ ਕਾਰਨ ਵਿਰੋਧੀ ਟੀਮ ਕੋਈ ਗੋਲ ਨਹੀਂ ਕਰ ਸਕੀ ਅਤੇ ਇਹ ਦੋਵੇਂ ਮੈਚ ਡਰਾਅ ‘ਤੇ ਸਮਾਪਤ ਹੋਏ।

ਇੰਨਾ ਹੀ ਨਹੀਂ ਟੇਕ ਚੰਦ ਯਾਦਵ ਪ੍ਰੋ. ਡਬਲਯੂ ਡੀ ਵੈਸਟ ਸਾਗਰ ਸਪੋਰਟਿੰਗ ਕਲੱਬ ਦੇ ਪ੍ਰਧਾਨ ਵੀ ਰਹੇ ਅਤੇ ਲੰਬੇ ਸਮੇਂ ਤੱਕ ਹਾਕੀ ਦੇ ਖੇਤਰ ਵਿੱਚ ਸਰਗਰਮੀ ਦਿਖਾਈ। ਪਰ ਸਾਲ 1962 ਦੌਰਾਨ ਟੇਕਚੰਦ ਯਾਦਵ ਦੇ ਜੀਵਨ ਵਿੱਚ ਭੂਚਾਲ ਆ ਗਿਆ, ਜਦੋਂ ਉਨ੍ਹਾਂ ਦੇ ਪਿਤਾ ਦਾ ਦਿਹਾਂਤ ਹੋ ਗਿਆ। ਇਸ ਤੋਂ ਬਾਅਦ ਉਸ ਨੇ ਮਜਬੂਰੀ ਵਿੱਚ ਪ੍ਰਾਈਵੇਟ ਨੌਕਰੀ ਕੀਤੀ ਅਤੇ ਖੇਡਣਾ ਵੀ ਛੱਡ ਦਿੱਤਾ। ਇਸ ਤੋਂ ਬਾਅਦ ਉਸ ਦੀ ਪਤਨੀ ਅਤੇ ਬੇਟੀ ਦੀ ਵੀ ਮੌਤ ਹੋ ਗਈ। ਜਿਸ ਕਾਰਨ ਉਹ ਪੂਰੀ ਤਰ੍ਹਾਂ ਇਕੱਲਾ ਹੋ ਗਿਆ।

ਅੱਜ-ਕੱਲ੍ਹ ਟੇਕ ਚੰਦ ਯਾਦਵ ਮੱਧ ਪ੍ਰਦੇਸ਼ ਦੇ ਸਾਗਰ ਜ਼ਿਲ੍ਹੇ ਦੇ ਛਾਉਣੀ ਖੇਤਰ ਵਿੱਚ ਇੱਕ ਟੁੱਟੀ-ਭੱਜੀ ਝੌਂਪੜੀ ਵਿੱਚ ਰਹਿੰਦਾ ਹੈ। ਉਸ ਦੇ ਘਰ ਕੋਈ ਨਹੀਂ ਹੈ। ਬੱਸ ਉਨ੍ਹਾਂ ਦੇ ਭਰਾ ਦੋ ਵਕਤ ਦਾ ਭੋਜਨ ਭੇਜਦੇ ਹਨ।