ਅੰਗਰੇਜ਼ੀ ਪੜ੍ਹਾਉਣ ਵਾਲੇ ਅਮਰੀਕੀ ਜੋੜਾ ਨੂੰ ਚੀਨ ਨੇ ਲਿਆ ਹਿਰਾਸਤ ‘ਚ

ਬੀਜਿੰਗ : ਚੀਨ ਅਤੇ ਅਮੀਕਾ ਵਿਚ ਕਾਰੋਬਾਰੀ ਤਣਾਅ ਵਿਚਕਾਰ ਚੀਨ ਵਿਚ ਅੰਗਰੇਜ਼ੀ ਪੜ੍ਹਾਉਣ ਦੇ ਕਾਰੋਬਾਰ ਨਾਲ ਜੁੜੇ ਇੱਕ ਅਮਰੀਕੀ ਜੋੜੇ ਨੂੰ ਹਿਰਾਸਤ ਵਿਚ ਲਿਆ ਗਿਆ। ਪੂਰਬੀ ਚੀਨ ਦੇ ਜਿਆਂਗਸੂ ਸੂਬੇ ਵਿਚ ਚਾਇਨਾ ਹੋਰਾਈਜੋਸ ਕੰਪਨੀ ਚਲਾਉਣ ਵਾਲੇ ਜੈਕਬ ਹਾਰਲਨ ਅਤੇ ਏਲਿਸਾ ਪੀਟਰਸਨ ਨੂੰ ਪਿਛਲੇ ਮਹੀਨੇ ਹਿਰਾਸਤ ਵਿਚ ਲਿਆ ਗਿਆ ਸੀ। ਉਸ ਦੀ ਕੰਪਨੀ ਚੀਨ ਦੇ ਸਕੂਲਾਂ ਵਿਚ ਅੰਗਰੇਜ਼ੀ ਪੜ੍ਹਾਉਣ ਲਈ ਅਮਰੀਕੀ ਅਧਿਆਪਕਾਂ ਦਾ ਪ੍ਰਬੰਧ ਕਰਦੀ ਹੈ। ਚਾਇਨਾ ਹੋਰਾਈਜੋਸ ਦੇ ਫੇਸਬੁੱਕ ਪੰਨੇ ‘ਤੇ ਕਿਹਾ ਗਿਆ ਹੈ ਕਿ ਦੋਵਾਂ ਨੂੰ ਝੂਠੇ ਦੋਸ਼ਾਂ ਵਿਚ ਫੜਿਆ ਗਿਆ ਹੈ।
ਏਲਿਸਾ ‘ਤੇ ਦੋਸ਼ ਲਾਇਆ ਗਿਆ ਕਿ ਉਹ ਲੋਕਾਂ ਨਾਲ ਗੈਰ ਕਾਨੂੰਨੀ ਤਰੀਕੇ ਨਾਲ ਸਰਹੱਦ ਪਾਰ ਜਾ ਰਹੀ ਸੀ। ਜੈਕਬ ਨੂੰ ਪ੍ਰਾਂਤ ਦੇ ਝੇਨਜਿਆਂਗ ਸ਼ਹਿਰ ਦੇ ਇੱਕ ਹੋਟਲ ਵਿਚ ਪੁਲਿਸ ਦੀ ਨਿਗਰਾਨੀ ਵਿਚ ਰੱਖਿਆ ਗਿਆ ਹੈ। ਪੁਲਿਸ ਨੇ ਲੰਘੀ 28 ਸਤੰਬਰ ਨੂੰ ਜੈਕਬ ਨੂੰ ਜਦੋਂ ਹਿਰਾਸਤ ਵਿਚ ਲਿਆ ਤਾਂ ਉਸ ਵੇਲੇ ਉਸ ਨਾਲ ਉਨ੍ਹਾਂ ਦੀ ਅੱਠ ਸਾਲਾ ਬੇਟੀ ਵੀ ਸੀ। ਉਨ੍ਹਾਂ ਦਾ ਮੋਬਾਈਲ ਫੋਨ ਅਤੇ ਕੰਪਿਊਟਰ ਲੈ ਲਿਆ ਗਿਆ। ਚਾਇਨਾ ਹੋਰਾਈਜੋਸ ਵਿਚ ਐਸੋਸੀਏਟ ਡਾਇਰੈਕਟਰ ਦੇ ਤੌਰ ‘ਤੇ ਕੰਮ ਕਰਨ ਵਾਲੀ ਏਲਿਸਾ ਨੂੰ 27 ਸਤੰਬਰ ਨੂੰ ਫੜਿਆ ਗਿਆ ਸੀ।